Jubbannde Seeɗa ko fayti e Daartol Moritani

Daartol ko geze jokkondirze. Anndude geze kewnooze ko vooyi, ina rokka nezzo faamde geze

guuraaze hannde. Ezen poti daranaade daartol men. Ndeen en njanngaano, walla en keewaano

jannguve, zemngal men kadi windanooka. Kono hannde en njanngii, zemngal men winndaama

ezen poti mooftirde geze men binndol haa renndooji gozzi zi ndana tuugnorgal, mbaasa wonde

wummiltoove, e oo aduna hooram hooreejo. Hoto puuynen hay huunde, zaccanen vesnguuji men

garooji cawaaje mbaawa anndude to ndewnozen haa mbaawa abbaade en walla jokkude laawol e

yiilaade pinal e vamtaare. Ina waawi tawa won e men annduve, kono won e men ve ngandaa wonde

daartol men, ina windaa kono winndaa ko e zemze koze ze yoga e men ngandaa, paamataa, kono

hannde Geno jaaraama. O rokkii en yimve jannguve, humpitiive zemze janane, haa mbaawa fulde

daartol men, cara zum e lenol men.

Tiiznozen kala e men baawzo wiztude, yoo wiztu, kala e men bawzo fulde ko wizta e zemze

janane yoo ful zum, mbele yoga e men ina mbaawa faamde zum. Kono zuum fof sellirta ko maa

Pulaar wiztee, janngee, winndee, jannginee haa kala biyoowo mbiimi ina waawa janngude e

winndude zemngal ngal

Ko adii Islaam

Hedde teeminannde tatabiire (3re)caggal jibineede Iisa, ngelooba naatnaama e lexxi Berbeer en

hono safalve e nder leydi Maruk. Ko zuum rokkive waawde taccude jolze mawze e sosde laabi

njeeygu peccitzi jeereende jeereende mawnde nde. Ziin laabi laatii korirzi faggudu Moritani e

duuvi 1500. Ziin laabi peccitzi jeereende mawnde nde, ngaddani jibineegol laamu ngadanu

vurngu mawnude e nder Afrik bannge hirnaange, hono laamu Gana, sarakulleeve, njoozinoongu

bannge worgo Moritani, ngu laamorgo mum wonnoo Kumbi Saleh.

Gila teeminannde 8 re haa 11 re, naange maggu saaftinooma, tawa saafti nge ko njeeygu kannge e

maccuve. Nde laamu Gana joozi nde, safalve ngonnoo tan ko arani en.

Hade Islaam naatde e nder Moritani, hozve e leydi he ngonnoo ko animist en, zuum woni diiineeji

taaniraave mavve, kove yimve ñawndotonoove no feewi ve ngonnoo ngam riiwtude ruuhuuji bonzi

e seyzaneeji. Haa hannde hay Islaam naatde e mavve e havaade zi, ezi keddii. Talki, lohi, pivi

 tawa ko aayeeji Kuraana loowa e mumen, cooma, walla aayeeji tawa ko aayeeje Kuraana mbinnda

e alluuje, lootee, nezzo moomo walla yara ngam riiwtande voorniizo o maa jarzo o bonande.

Wileeve ngonnoo safroove mavve, eve njoginoo baawze haalde ko fayi arde. Nde Islaam ari nde,

seernaave lomtii wileeve e safroove.

Naatgol Islaam

Nde safalve maruk naatna e nder Islaam e teeminannde (8re), safalve, sanhaaja en ngaddi Islaam

e nder Moritani tawa ndewi ko e laabi njeeygu, peccitzi jeereende mawnde nde. Nde wonata

teeminande 11 re, taw Islaam yettoyiima bannge worgo Moritani. E oon yonta nayaval e laamu

Gana ko julannkoove islaamiyankoove, kadi hedde jumaaji 12 ina ngonnoo toon, kono zo laamzo

o wonnoo zo ko diine taaniraave tan rewetenoo. Tuubnugol mawngol e nder Islaam ardi ko e laamu

almorabizuun en. Ndeen dillere mawnde fuzzii ko nde koniyanke capaato gooto biyeteezo Yahya

Ibn Ibraahiima Alaghdali ummii makka, wo danñ wallidiive, ve ummanii tuubnude safalve sanhaaja

en. Ndeve tuubni veen, ve njaavani firtoyde laamu Gana, ngu wonaano Islaamiyankeewu. Ve ummii

laamorgo mavve wiyeteengo Ajjugi, ve njaggi wuro Awdagost, tuugninoongo e laamu Gana, tawa

ardinoo zum ko julankoove safalve hedde 1054, ve nduppi wuro ngo. Hedde 1076, ve njokki fayde

bannge worgo e ballondiral e laamu safalve Moritani, ve pirti laamu Gana. Nguun poolgu saabii

caragol Islaam e nder Moritani fof haa e nder hirnaange jeereende mawnde. Ve udditi duze

janngirze Islaam e nder gure Moritani vooyze hono Sinngiiti, Waadaan e Waalataa.

Njiimaandi Aarabeeve

Haa e teeminannde 12 re, hoznoo e nder leydi Moritani to rewo e hakkunde ko eggiyankoove

safalve, daande maayo ko valeeve fuzziive naatde e Islaam ngonno toon. Zemze vurnooze

jaalaade ndeen ko Pulaar e Safaroore. E cakkitte teeminannde 12 re, eggiyankoove, koninkoove

aarabeeve, vurve anndireede Bani Hassan en, ummiive Yemen tawa neli zumen ko laamu Misira

yoo njah njiimoya e Afrik bannge rewo, laamve Maruk ndiiwive, ve njokki, ve pelliti jiimde e

Moritani. Caggal hareeji keewzi, ve kevi joozaade e leydi he. Aarabeeve e Safalve kavii fotde wonde

teeminanze keewze, kono hare mavve vurnde bonde nde, ko hare balze capanze tati (30)

wiyeteende Sar Buuba hedde (1644 haa 1674). Caggal zuum safalve fof njavi haalde zemngal

ummingal e Arab biyeteengal Hassaniya, zemngal jiimnoove ve. Iwdi koniyankoove Aarabeeve

ngonti lawakoove, safalve Beerbeer en ngonti no arani en nih. E oon saha kadi taw maccuve valeeve

heewve naatii e nder diine Aarabeeve e safalve. Safalve ve ngannduzen hannde ve, ko faandu

almuudo, ummiindu e Aarabeeve, beerbeer en e maccuve valeeve.

Gargol raneeve e kolonaal en

Jokkondiral Iisiyankoove e Moritani fuzzoraaki no moxxi. E hitaande 1445, laana Portugees en

ngoota, joofii e tufnde wootere e nder Moritani, vurnde anndireede hannde banndargen, ve njoofi

e gurel Beerbeer en gootel, ve njaggi 29 capaato, ve nawi zumen portigaal, ve njeeyi zumen. caggal

zuum Purtogeec en ndazii maayo Senegaal, ngam naftoraade njeeygu maccuve e zacce. Caggal nde

Purtogeec en njahri yeeso e nduun faggudu, kiram mawzam naati hakkunde mavve e julankoove

Farayse, Almaan e Angalteer. Tuubakoove ina ngaddatnoo fetelaaji, comci e suukara ekn.., ngostoo

zum zacce walla maccuve, tawa veen maccuve ko moritaninaave njaggi zumen, ngostii zumen.

E 1800, Moritani hannde o feccinoo ko e laamuuji luurondirzi nay: Tararsa, Barakna, Adraar e

Taganit. Tuubakoove Farayse naftoriima hareeji hakkunde ziin laamuuji haa mbaawi dañde

maccuve ve njeeyoyi. Caggal nde Saawiyee Kappolaani wara, dillere mawnde wazi, tuubakoove

Farayse ceki no feewi, ve njiimi e Adraar e hitaande 1908 e Hooduuji e hitaande 1911, e hitaande

1920, moritani laatii njiimaandi Farayse, e hitaande 1958, moritani yalti e njiimaandi Farayse,

laamorgo mum hono Nuwaasoot diidaa. Nande 28 Nofammburu 1960, Moritani hevi hoore mum

wonti leydi ndimzundi. Ko heewi e men ina ciftora ko kewnoo ko ina mbaawi winndude, kaalana

vesnguuji men garooji holko kewnoo, gila Moritani hevi hoore mum haa hannde.

Kevtugol Moritani hoore mum

Nde Moritani hevi hoore mum e hitaande 1960, ko e maalde hakkunde safalve e tuubakoove

Farayse Muttaar Wul Dadda laamii. Ko goonga e oon sahaa, safalve keewaano jannguve zemngal

farayse, ko valeeve vurnoo janngude zemngal farayse ngal. Sabu e laamu tuubakoove, ko waawnere

nezzo janngirta ko e waawnere kadi nezzo wontirta dadiizo.

So en xeewii e laamu Muttaar, jaagorze laamu keewze ko valeeve liggotonoo zumen. Kono laamu

ngu seeraani e findinde e jannginde safalve wozeeve, zemngal farayse ngal haa mbaawa janngo

lomtaade valeeve ve. dawrugol janngde bonna, Arab naatnaa e maggol, mbele valeeve ina njahra

caggal, kono zuum hazaani ve wonde feertuve, have nbaawi nih vurde won e safalve e zemngal

Arab. Valeeve luundinooma baylugol dawrugol janngde ngol kono won noon ko vuraave doole kadi

leydi Farayse ina tonngtunoo safalve e ngoon miijo sabu mbele zemngal mumen ina jokka

janngeede e leydi Moritani.

Safalve njokki jannginde e findinde leñol mumen, e hiizaade valeeve. E hitaande 1978, koninkoove

safalve livi laamu Muttaar Wul Daddaa, caggal nde o naatni Moritani e nder hare sahara.

E hitaande 1984, koninke biyeteezo Maawiya Wul Siidi Ahmed Taaya yandini laamu

koninke biyeteezo Mohammed Kuuna Wul Haydaala, sabu miijooji makko e niivnude sariyya

islaam e nder leydi he, e sabu luunndagol makko hono dawrugol " Faawru ngalu Adunayankeeru"

rokkooru walla kosiroowu ngaluuji leyzeele baasze e dow dokkugol ñamaale.

E hitaande 1986, valeeve haavnoove njiimaandi safalve caakti deftere wootere ina kaala heen

kiidegol valeeve e waasde potal e waasde zumen hevde hakke mumen e nder leydi he. Kono nde

deftere nde saaktaa, yoga e mavve njaggaa, cokaa, mbaraa ko heddinooko dogi fayi caggal leydi.

Won heen maayi ko e nder kasoo Waalata hono "Teen Yuusuf Gey". Ndeen safalve njananaama

wonde valeeve njavaani jiimireede no safalve valeeve ve njiimiraa nih, ve ngoni e jokkude peeje

have mbaawa waztude valeeve no hardaneeji nih. Ve commpi zemngal Arab e nder dawrugol

janngde leydi, belaazo janngat mo welaaka janngat. Zuum waziraa ko mbele valeeve ina njejjita

zemze mumen , pine mumen, cozoo e safalve. kono valeeve kavaa haa duzal zemze ngenndiije

cosaa, zemze ngenndiiji ze mbazti janngeede, kono loowaaka e nder duze laamu.

Kitaale nivve e nder daartol valeeve Moritani

Tuggi hitaande 1986 haa 1991, laamuuji safalve oynii beeli valeeve. E hitaande 1987, koninkoove

valeeve, njizi livde laamu Moritani, kono ve njiita gila hade mavve wazde ko ve njizi ko, tato e

mavve pellaa ñalawma gooto, heddiive ve coka, piya, leeptaa lepte cattuze haa heewve e mavve

maayi e nder kasoo. E hitaande 1989, hareyel hakkunde leydi Moritani e Senegaal, safalve xetti oon

fartannge, tawde ve mbarii valeeve, ve cokii, ve piyii kono haa jooni ina ndilla ina kezdii, yove

taccin zumen caggal maayo mbele ina ngonta Senegaalnaave. E hitaande 1991, ve njokki kadi

momtude goodal  valeeve, ve takki zumen yizde waklitde laamu, ve njaggi koninkoove ve fof, ve

coki zumen, ve mbari ko vuri heewde ko, ve mbardi zumen no soofi. yiyaama hay e nder jumaaji

valeeve ina mbaree heen. Holto Diine Islaam woni?

Baylugol sawru laamu safalve

 Ndeen aduna yiyii ko Moritani wazata valeeve ko, e caggal nde leydi Farayse wiyi"wonde ballal

mum e fayde e leyzeele Afrik fawii ko e naatde zumen e ''Potal" demokraasi, laamu safalve felliti

naatde e Demokraasi, mbele bone mo wazatnoo o ina suddoo. Safalve tuugnii e doosze leydi Farayse

ngam wazde doosze leydi Moritani e hitaande 1991, ve mbazi e doosze he ko Zemngal Arab woni

zemngal Moritaninaave fof, kadi ko Diine Islaam woni diine leydi ndi fof. Ve ngooti doosze mavve.

Nde yontunoo pelle dawrugol ina cosee, ngam foozondirde laamu, Maawiya yiyi gixxande valeeve

safalve mum e lexxi gozzi mum, o wazi nelaave zizo fayde e Ahmed Wul Daddaa, mini mum

Muttaar, tawde ko capaato bozeejo yoo ar ve poozondira laamu hoto ngu faytude e juuze valeeve.

Ahmed javi, ari, tawi njuuvvudi valeeve mawndi (UFD) ina waza, ina foozondira ngardiigu,

o hevti ardorde nde. Wooteeji mbazi, o fooli, kono laamu Maawiiya yamiri gardorze koninkoove

kala to ngoni yoo mbaylu limgol karte ngol haa waawa foolde, zuum waza, valeeve mbiy ina

kawnitoo, Ahmed salii. Caggal zuum UFD fusi, Masuud Wul Bulkayri e Ibraahiima Saar cosi fedde

wiyeteende "AC". Caggal zuum ndeen fedde laamu fusi zum. Mesuud fayti 'APP' tawi woni toon ko

safalve foozantoove aarabaagal. Bah Mammadu Alasan ne sosiino fedde wiyeteende "PLEJ"

E teskaade e duuvi gadani "Demokraasi" Moritani, yoga e valeeve mbazatnoo ko dawrugol goddol

wonaa dawrugol yiyannde wozzunde, ko zuum wazi heewve e mavve puuntiraa jawkal e postoyel

njejjiti jeytaare lenol. Laamu safalve fecci valeeve, valeeve njavi fecceede, doole mumen ustii,

verze yoga e men taayi, wazi yaltuve leydi, wazi nefve dawrugol, wazi suuziive e pelle ze ngonaa

laamuyankooje.

Jahgol Maawiya e gargol Hammee gozzo

Laamu fenaande sompaama e Moritani e gardagol safalve. Laamuuji zi kala ceeraani e jannginde

safalve tiizi tan ko lenol, danal, zemngal, pinal ekn..., ngalu leydi fijiraa, rewve safalve mbewnaa

Valeejo, so wonaa dewzo e gazaaji mavve ina laaxoo, hiivaa, hiizaa. Nde bonannde nde juuti,

woodi huunde e safalve, ve kexaano e laamu, njizi livde laamu Maawiya nande 08 Suliyee 2003

kono kevaani. Caggal zuum leydi ndi wazi jiivru, woodi sokaave, safalve mbaasi

weltaade. Maawiya e wallidiive mum paayi. Nande 03 Ut 2005, deenatnoozo mo o hono,

Muhammed Wul Abdel Asiis hevti laamu makko tawi omo yahnoo makka duwaawu, o rokki laamu

ngu hono Eli Wul Muhammed Faal, wonnoon ko kanum vuri duuvi. Maalde safalve, yizde laamu,

njoptoor hakkunde rewve safalve fof ina gasa wonde. Safalve ina njogii ngowaari. Ndeve kevi laamu

nde ve podanii vivve Moritaninaave potal e peewal, kono ve mbiy mave ngon e ardorde he lebbi 24

caggal zuum ve mbazti lebbi 18. Wooteeji meeriiji mbazaa, depiteeji mbazaa, senatooriyaal waza

e nder zuum hayso ve ngonaani jaambureeve, yahrii no haanirta nih e tuugnaade e lenam lenaagu,

e kaalis e banndiraagal e haasidaagal haa gasi. Nde ziin wooteeji ngasi, yaavanaa woote

persidaasiyel, hono poozondiral jappeere laamu leydi ndi.

Goomu koninkoove zooftaaki podooje mum

Gooto e safalve wiyi "Moritani ko tiliisa, ko kaalza e mum fof nanete boowal"

Goomu koninkoove tafii feere haa waawi wuuranaade poozondirteezo jappeere, hono Siidi Wul

SeeK Abdallaahi. Ve mbiynoo ko eve ngona jaambureeve e poozondiral ngal, kono zuum laataaki

Goomu o kadi haazaani zoon tan, nde wonnoo eve nganndi, Moritaninaave mbazata ko dawrugol

goddol, yoga e liggotoove e laamu e jaagporze mawze e meeruuji e senateeruuji e dipiteeji

mbaawnaama yoo njinngan Siidi. Safalve heddiive ve e valeeve peccii e nder goomuuji walla

pelle keewze

Fulve/Haalpulaar en mbaasi fartannge

Haalpulaar gooto, biyeteezo Kan,  meeziino huutoreede yoo won poozondirteezo laamu ngam

veydude feccude valeeve. Dawrugol lonngel, maa postoyel hoomti valeeve heewve, sabu baasal.

Ko baasal, waasde potal faggudu e laamu ngaddani ve jiimeede haa ve njava sakkaade e les safalve

So en xeewi laandaaji dawrugol safalve Moritani fof no potiri, alaa heen fof to valeeve njiytotoo

koye mumen. Ko goonga won e proograamuuji mavve, memzi ngootaagu hakkunde vivve leydi

kono njavaani memde nawannde nde. Heewve e mavve kaali potal kono kolliraani, holi no

ponndirta lexxi zi so laamiima.

Hannde ngootaagu leydi so ina xeewee, ko adii fof zemze e pine mavve yoo ponnde e zemngal

Arab e pinal safalve. Safalve njinngan koye mumen haa nde mbazi e ndee doosze laamu wonde

ko zemngal Arab woni zemngal moritaninaave fof, mbele lexxi moritani fof ko Aarabeeve, walla

mbele safalve vuri valeeve e leydi he? Doosze laamu gootaaze 1991, zo Arab wiya ko kanum woni

zemngal moritaninaave fof, to Arab e Pulaar e Soninke e Wolof ngoni zemze ngenndiiji,

ko safalve tan ngooti zum, hay sinno won valeeve wootve zum ko e dow waawnere. Zemze

valeeve ina poti fotndeede e zemngal Arab, cozee e dawrugol janngde leydi ndi.

So zuum venni, ngootaagu so ina xeewee, yoo waktuuji potnde e nder 'rajo e tele', kala zemngal

yoo fotnde e gozze ze waktu.

So potal ina xeewee, yoo ngaluuji e nder leydi he pecce, zuum firti ko hannde so en xeewii, ko e

nder resiongaaji safalve tan ngalu leydi ittetee, walla yiiletee, tawa ngalu e nder resiongaaji valeeve

ina woodi kono liggaaka, yiiletaake kadi ngaluuji kesi. So en xeewi, maayo dadiingo resionngaaji

valeeve, ko ngalu mawngu, so laamu jogiima pellital, Moritani maa jeye e leyzeele vurde waawde

yeeyde nguura caggal leydi, zuum firti ko moritaninaave keydataa, maa njone koye mumen to

bannge nguura, zuum ko yimve annduve ndema e ngaynaaka mbitti, njaltini, kono laamu javaani

feewde heen sabu adotoo naftoraade zum ko valeeve wonve daande maayo. Zuum kadi ina jeyaa

ko ve ngaddi hardaneeji ve togni zumen e daande maayo sara gure valeeve vooyze, ngam so

wontii  ala e sago maa maayo ngo liggee, tawa wonaa tan valeeve ngoni toon. Zuum kadi addani

ve waylude dawrugol ko fayti e 'leydi' walla 'jeyi' e wiyde leydi alaa joom mum, jeyi zum tan ko

liggiizo zum, zum fof ko yizde heptude jeyi valeeve rokka zumen joom jawdi en tawa ko safalve

yoo liggo leyzeele ze.

So zuum venni, so potal ina xeewee, yoo xeewe holi no valeeve poti e nder jaagorze mawze he?

Valeeve ina limo, mbele wazi noon ko ve ngalaa humpito? alaa ko jinngol haa hannde rewi zoon.

So ngootaagu ina xeewee, yoo ko irinoo ko irte haa yalta, bonanndeeji baznoozi gila 1966 haa

1991, anndee wazve zum ve, so ve njaafete ve njaafee, so ve naawete ve naawee.

Proograamuuji safalve won haalve ko fayti e warngo e taccingol valeeve, kono zuum ko ngam

hoomtude e yizde fuuntude valeeve yoo cozo e pelle mavve. Ve ceeraano e wiyde valeeve mbaraaka

taccinaaka, hayso won taccinaave, veen ko senegaalnaave. Ko fayti e warngo e taccingol, ezen

nganndi ko kamve fof mbari, ko kamve fof taccini, sabu nde valeeve mbaretee walla taccintee nde

hay gooto e mavve daraaki wiy hoto zuum waze. Yoga e mavve mbiy ko valeeve taccinaaka, ndog,

hay safalve luunndinoove laamu Maawiya ve ko noon mbiy. Kono e nder laamu Mawiyaa, waziino

ko wiyetee "mooyto ngartaa''.

E nder proograam Siidi Wul Seek Abdallaahi, ina waznoo gartugol valeeve e leydi mumen e

jokkondiral e laamu senegaal e HCR (Fedde toppitiinde mooliive), hay nokku toppitiizo naattinde

ve e nder nguurndam leydi. Kono zuum fof e wonde huunde moxxere ko haa nanee boyi laawii

nayi, have mbaawa kadi hevde karte valeeve, sabu caggal nde o laami, ve puzzii artireede, kono

holto ve payraa? ve mbazaa ko e nder tillison HCR ellee wonve e leydi njananndi, ve mbazaa ko

e nokuuji zi ngalaa ndiyam, jannngirze, cafrorze, remru.

Caggal nde laamu Maawiyaa yani, diisnondiral waziino hakkunde Bah Mamadou Alassan e

Ibraahiima Muktaar Saar kono ve paamndiraani, ve kawraani, valeeve beydii feccaade, ve ngaanni

yoga e valeeve, haa eggi e mavve payti e safalve. Oon peccoor ina boni e men, kono tan laawol

feranaama yontaaji garooji yoo mbaztu foozanaade laamu, ngannda, mbaza ko e leydi he njeya,

kadi ina poti laamoraade no safalve laamorii nih.

Nde wooteeji zi ngasi, zizo ardiive njalti, hono Siidi Wul Seek Abdallaahi e Ahmed Daddaa.

Koninkoove noddi Masuud Wul Bulkayri yoo yantu e Siidi, podani zum wonde mawzo suudu

sarziiji, javi. Ibraahiima Saar fayi to Ahmed Daddaa, wooteeji mbazti, Siidi hawi, wazi noon

Jeyn Wul jeydaan garnoozo tatavo e Masuud garnoozo nayavo fof ko e mum payti. Yoga e valeeve

njiziino yoo Saar faytu e Siidi kono javaani, ko zuum wazi heewve wallunoove mo walla

wootannoovemo sabu kiram nguru vanndu calii wootandemo e wooteeji 18 Juliyee 2009.

Nde yahnoo haa Siidi joozi, tawa joxxini zum ko koninkoove, cazeele keewze ngari. Won wiyoove

nih hay nde o laamii nde won e geze o waawaano wazde, kono omo joginoo ndimaagu feccude e

koninkoove ve jaagorze mawze ze, moni kala waza heen yimve mum. Caggal dumunna juutzo

 wo takkini koninkoove tato, addunoove e makko laamu ve garaade Seneraal. Cuval Siidi wonno

laawol gadanol e daartol Moritani nde mo wonaa koninke laamii, hay sinno ko koninkoove

ngaddimo. Jayii e aduna he fof wonde e Moritani, koninkoove ngoppii laamu, ve ngonaa

koninkoove laamiima. Caggal luure keewze haa teengtinoon e hakkunde Joom suudu Siidi e

Seneraal Wul Abdul Asiis. Ko jayi wonde debbo o waztii pale o no galle mum nih, wazti

hay addude heen debbati gorkati en. Koninkoove mvazdi maalde e won e depiteeji, njizi livde Siidi.

Laamu ngu waylaa laabi zizi, nde Fedde UFP e APP naatti e laamu yoga e depiteeji ballunoozi Siidi

haa joozi, mettini, haa Siidi wiy ina folla suudu sarziiji.

Wiyaama wonde, koninkoove ve njiznoo ko joxxinde Siidi, ittazum e laamu, ko zuum tagimo

wiyde omo voorave. Won heen mbiy wonde wiydemo omo vooramo nde wonaa goonga sabu

kaayit o siifaaka, kono zuum fof e wayde noon, ve njaggimo, ve cokoyimo pale kongere, ve mbiy

wonde ve ngoni ko e feewnitde demokraasi o.

Ko goonga e nder laamu Siidi, leyzeele keewze cikkiino wonde leydi ndi ma deex tawde joozii ko

mo wonaa koninke, zuum wazi ve kokki leydi ndi balle keewze, kono caggal hitaande e laamu

makko coggu veydiima no feewi, haa yimve kawnitii e nder leydi he hay sinno won wiyoove ko

koninkoove ve ngonnoo caggal mum, kadi tuubakoove mbaraama, koninkoove moritaninaave kadi

njanaama, zuum fof won wiyoove ko kamve koninkoove ve kadi keedi caggal mum.

Nde koninkoove ve kevti laamu e juuze Siidi jiivru mawndu wazi e nder leydi he, Moritani feccii e

pecce zizi, heen feccere wondi ko e koninkoove, ndeya feccere wiy ko yoo Siidi artu, ngondi

ko e pelle APP, UFP e ADIL woni parti laaminoozo o.

so en xeewii, wonnoon koninkoove ina coomnoo jamfa gila adan, ve ngoppii yimve ve njokkaaki e

landaaji dawrugol yoo poozotiri laamu. Ko veen wiyeteeve 'jeytiive' nde ngari e cuuzi sarziyeeji,

mbaawni kolonel o yoo eto livde laamu Siidi, tawde ko kamve veydii saabaade ha o laami. Nde pelle luunndinooze laamu Siidi naati  e nder jaagorze mawze laamu, ve veydii jirgitaade, ve mbiy woy

saayoo ko kamve ngaddi Siidi, ko veya virata.

Laamu 'Seneraal'

So en xeewii gila nde Muhammed Wul Abdel Asiis livi Maawiya, haa e wooteeji 18 Suliyee 2009 ko kañum laamii Moritani. Ko kanko livi Maawiya o rokki laamu Kaawi makko Eli Wul Muhammed

Faal, nde Eli yizi duñde e wootde Kartal danewal, ko kanko Asiis hazi. Nde laamu Eli Joofi, ko kanko addi Siidi yoo won poozondirteezo laamu, ko kanko kadi saabi haa laami. Zuum wazi, ndeve

luurdi o itti mo tawde ko kanko waznoomo. Nde o itti Siidi, jiiivru mawndu wazi e nder leydi he:

Ahmed Dadda, nde wonnoo ko e Siidi foozondirnoo laamu, zaminiima wonnde maa hev laamu, walla hay so hevaani laamu ina waawi feccude laamu e Seneraal Asiis. Nde o itti Siidi o moofti zum ko e nder Pale Kongre. Lanndaajin politik hono APP e UFP njirgitii sabu ve naatiino e laamu Siidi. Ahmed Dadda yiziino yahdude e Ibraahiima Saar kono hakkunde mavve juutaani. Lannda AJD/MR luurdiino, heen senngo wiyi yo ve kevtin laamu Seneraal, ngoya wiyi alaa. Lanndaaji luunndiizi zi njizi wazde havvere haa mbaawa havaade laamu Koninkoove, ndillini nder e caggal leydi. Leydi Moritani yowa e nder UA, fedde Francophonie, UE dartini liggondiral mum e mayri. Jiivru mawndu wazi e nder leydi he, yimve heewve mbiyi yoo Ambassaade Israaiila itte e leydi he, Muhamed Wul Adbel Asiis yaltinirive no soofi, tawi kadi ko Muammar kaddaafi veydii dunde mo e zuum.Yimve mawve heewve e fedde UA ngariino ngam yiilaade jam kono jam o ronki daneede. Yah ngartaa mawzo wazi hakkunde Moritani e Senegaal, kono e oon saatu hono Muammar Kaddaafi e Abdullaay Wad ngondunoo ko e Seneraal Assiis. Laamu Farayse kadi ina wondi e makko, semmbiniino livgol Siidi hay sinno fenninaaki heen haa laavti. Nanndiral Ndakaaru siifa wonde lanndaaji dawrugol luunndiizi laamu Seneraal ina njahda e makko wooteeji 18 Suliyee 2009 e nder sarziyeeji limtilimtinzi. Wooteeji mbazi, Seneraal gani e daawal gadanal. Sunnotoove caggal leydi mbiyi wonde wooteeji zi njahri no haanirta ni. Jaagorgol toppitiingal wooteeji kadi siini ganagol Seneraal. Kono yimve zizo walla lanndaaji zizi ko vuri teengtude (APP Masuud e RFD Ahmed ) calii heptinde laamu makko. Wo tozzii Muulaay Wul Muhamed Lagdaf hono mawzo jaagorze laamu, o tozzii laamu makko. Yah ngartaa keewzo wazi e yoga e leyzeele ngam yoo keptin laamu ngu. Ngu heptinaa caggal leydi.

Hade makko laamaade, o wazi geze keewze gaddanze ko vuri heewde e moritaninaave wondude e makko. O jaggii yimve heewve o soki zumen, sabu ngujjii jawdi laamu, hay sinno saabii zum ko njovtiigu. Muhammed Wul Abdel Asiis ittii ambasaad Israiila, yoga e yimve luunndinoove mo payta e makko, yoga e leyzeele aarabeeve e leyzeele juulve njaarimo. Ko noon wo heviri naasiristuuji e baasistuuji e islaamistuuji keewzi e nder Moritani. O yehii kahayzi, o wiyi wonde laamu Maawiya warii valeeve, taccinii, ve mbazii toon juulde maayzo mo tawaaka, zuum fof hay so ina moxxi, ko mbele omo heva valeeve. O girri kadi ma waraave ve kev iddiya. O nelii hono Kolonel Jah Aadama Umaar yo yah e nder gure fuuta ngam xeewde so tawii tooke valeeve puzziima jippaade. Muhamed Wul Abdel Asiis fuzzorii ko to fotnoo wortoreede zo ko fayti e warngo valeeve. Sabu e oon saha omo wondunoo e koninkoove mawve jeyaave e ve juuze mumen moddi xiixam. Valeeve nde mbiyanoo yoo ngar xetta kaalis maayve mumen tan ndiiri ngari, kevi ko nafataa. Zoo Muhamed Wul Adbel Asiis huutoriima won e valeeve e seernaave mawve ngam taccude ngal zoo daawal. So nezzo ma waraama, a hokkaama kaalis a naami, wayi kono a yejjitii zum nih, holko mbaawza foozanaade gozzum. fayndaare Muhamed Wul Abdel Asiis wonno ko e ubbude kala boneeji valeeve mbazanoo, haa dannda safalve e naawooje. Seernaave e won e pelle valeeve e koninkoove valeeve hono Jah Aadama Umaar en mballiimo haa o siini. Fotnoo wonde ko yoo warnoove valeeve ve ngannde, so njaafete njaafee, so naawete naawee, maayve ve nganndee to ubba, ubbitee, ndokkee koreeji mum, njulaa zumen, wonaa fuuntude seernaave haa njuula maayve ubbaave, ve nganndaaka to ubba, ina fotnoo kadi veen vooranoove ngarta e liggaayaaji mumen, njovee ko liggaaki ko fof, veen fotve yahde alateret nawee, keva hakke mumen, mbatta kadi yoveede pensiongaaji mumen. Heptinde laamuuji vennuzi zi mbari, taccini tan yonaani. Ko goonga e oon sahaa Asiis yiilotonoo ko karte valeeve, waasde mo nawndude cazeele ze no foti nawndireede nih addani safalve ve o yizi danndude ve kadi wootande mo. Geze keewze ndentii ngam yoo Asiis laamo: Koninkoove mballiimo no feewi wonnoon ko laamu mumen, Moritaninaave mballiimo wonnoon ngaanii, zaminiima moxxere sabu haalaaji makko vutti ko fayti e havaade nguyka ngalu leydi, nawndude cazeele valeeve e hardaneeji e havaade baasal, Farayse kadi wallii wonnoon ina zaminii liggaade petrol Moritani, Abdullaay wad e kaddaafi kadi mballii haa nanondiral ndakaaru siifa. Kono kala Moritaninaajo mo zaminaaki longere e laamu walla pinzo walla paamzo leydi ndi ina anndi wonde Asiis waawaa feewnude moritani, sabu hay so o yizi liggaade leydi ndi, yimve haznoove Moritani yahrude yeeso gila adan ve daccataamo, ko refti heen ko o koninke, o diisnotaako, o urnoto tan, so zuum venni o yizaa laamu yalta koninkoove. Ve njizi ko Moritani yoo galleeji seeza laamiizi zi yoo ngalzu tawa ko kamve ndeenata zumen hoto laamu yaltude e juuze safalve wozeeve. Moritani ko Asiis e sehilaave mum senerooji laami zum, etee sazat e leydi he ko ve ngoppa laamu, ina waawi noon ve mbaza goove jiile haa gooto e mavve fof dana laamaade.

Ko goonga Ummannde Seneraal hoomtii heewve. Hay miin e hoore am mi zeviino sikkude wonde ina waawi o wayla leydi ndih, walla ndi taavo taaval manngal to bannge potal. Ko goonga ina waawi tawa to bannge evvude evvooji mawzi haa leydi ndi waawa yahrude yeeso e vamtaade, en pelataamo sabu ko o koninke, kono omo waawnoo fawde haayre ngam ngootaagu leydi ina laatoo.

Yiyannde Safalve wonande dawrugol janngde Moritani gila 1959

Gasataa so en njizi faamde dawrugol janngde leydi Moritani, e ko bonni zum, e no safalve njiziri lankirde valeeve e leydi he, nduttozen caggal seeza haa paamen ko wonnoo anniyaaji mavve e hono ve ciiniri dawrugol ngol ve njiznoo sosde e leydi he.

So en nduttiima e doosze laamu leydi Moritani gila 1959 haa 1961, eze mbiya wonde Arab ko kanum woni zemngal ngenndiyal, Farayse woni zemngal liggorteengal. Zum ina hollira wonde zemze gozze kaaleteeze e Moritani ze, ndiiwtaama e wonde zemze ngenndiiji walla liggorteeze wazi noon ko Arab tan rokkaa yo won zemngal ngenndiyal, ngal kala Moritaninaajo foti haalde.

Ina jeya e xoxre Muktaar wul Daddah waawde mo, huutoraade won e peeje hawo waawde fuuntude valeeve wondunoove e makko ndeen. Muktaar wul Daddah tuugninoo hoolaare mum ko e wiyoove rimve laamiive valeeve ngam waawde jokkude laamaade leydi ndi e fewjude peeje mum. E nder haalaaji makko wo noddatnooko ngootaagu vivve leydi ndi kala kanum en fof e waasde wonde lenol gootol kadi wo hunoo ma o zoofto o hormoo faandu almuudoyaagal Moritani. O wiya kadi wonde Moritani ko diidel denndinoowel hakkunde Magreb Arab e Afrik Valeejo, mahiindi e Islaam kono udditiindi e leyzeele mawze. Ziizo haalaaji ngaddani mo jogaade hoolaare renndo valeeve e tuubakoove Farayse, kadi o resnooko debbo tuubaako Farayse naajo. Mbaylaandi jangde waylii seeda wonande waktuuji Arab (6), waktuuji Farayse (30) e nder yontere, wonti waktuuji (10) Arab, waktuuji (25) Farayse e nder yontere, haa wonti waktuuji (Arab), waktuuji (25) Farayse e nder yontere wonande duze tokoose. E oon sahaa waznoo ve rokkude Arab waktuuji keewzi ko ngam xeewde baztinde jangde renndo e jaabaade yoga e zavvaande safalve ndeen, foozantonoove yoo Arab hokke hakke mum e nder jangde leydi.

E baylugol janngde leydi 1959 e veydude e mum waktuuji Arab, ngaddani safalve foozanaade yoo Arab vur janngeede a Farayse wazi noon ve mbiyata Arab ko zemngal mavve neeniwal, valeeve Moritani nde njiznoo ko yoo Farayse vur janngeede sabu Arab wonaa zemngal mum neeniwal.

E hitaande 1964, laamu safalve fewji naatnude tovve Arab e nder kawgel ngam yawtude e tolno gozzo. E hitaande 1966 laamu safalve yaltini doosze yoo Arab won zemngal janngetengal ala e sago e nder duze hakkundeeje ze. Valeeve Moritani naniraani zum jam, almuvve duze Nuwaasot e Rooso tawa tongtizumen ko valeeve mawve wonve e laamu, hono winndunoove ko wiyete, "manifeste des 19', kawnitii, hare wazi hakkunde almuvve valeeve e almuvve safalve, wazi maayve e gaaniive, duze hakkundeeje ze uddaa hade hitaande jangde maayde.

Hakkunde 1967-1973 laamu safalve e gardagol Muttar wul Daddah fewji zemze zizi fof Arab e Farayse yoo njannge e duze laamu fof. Muttar wiyi Farayse yoo jannge mbele Moritani ina hevindoo geze aduna kese, Arab yoo jannge mbele ina reena pinal Arab e diine Islaam. Feere nde wonnoo ko vosirde seeza seeza ngam yoo Arab vurto Farayse waktuuji, kono ko jam jam ve njahri. Ko ndeen ko wiyetee CIA sosaa, zuum firti ko hitaande addannde, so cukalel naatii ekkol janngata tan ko Arab.

E hitaande 1968, doosze laamu mbaylaa ngam yoo Arab won zemngal ngenndiwal e liggortengal sara zemngal Farayse. Zemngal Arab ina vosniree seeza seeza gila e Resiongaaji haa e Departemaaji, Guverneeruuji e perefeeji mbazaa jannguve Arab, mbazti winndude e Arab, haalde safaroore. Ngol dawrugol janngde yoolii sabu wonande Valeeve Arab rokkiraa doole ko ngam lankude zumen, ngam yizde laamaade zumen.

Hakkunde 1973-1979, sevvitiive safalve e wondude e laamu mbayli jokkondiral hakkunde Moritani e leydi Farayse: Ugiyya sosaa, MIFERMA wonti sosietee laamu. Laamu ngu felliti waztude Arab zemngal vurngal Farayse ngam lankude valeeve e waawde jiiimde zumen e wostaade zumen. IPN sosaa ngam waztude muulde defte sabu defte goodnooze kala ngonnoo ko e zemngal Farayse wonande safalve ko zemngal jizngal waylude Moritaninaave yoo njogo pinal Farayse, kamve ne ve njolbini ngal ngam ngam janngude Arab e waztude Moritaninaave fof aarabeeve walla safalve. Ekkolaaji Arab cosaa, janngatnoove mahadraaji mbaztaa jannginoove duze laamu.

Ezen poti faamde tawde kamve safalve ve caliima njiimaandi zemngal Farayse hoto ve paggitaade pinal mavve, ennen en potaani javde ve pawa e men zemngal Arab tawa fayndaare mavve ko yizde ubbude pinal men e yoolde zemngal men.

Hakkunde 1979-1999: Baylugol dawrugol jangde leydi e hitannde 1973 fof danaani siyneede sabu e hitaande 1975 hare hakkunde Moritani e Sahara ummii, leydi ndi naati cazeele mawze, haa sevvitiive safalve njokkondiri e koninkoove safalve have livi laamu Mutaar Wul Daddah e hitaande 1978. Sevvitiive "Naasiristuuji e Baasistuuji" veydii nannude e payndaale mumen e waztude leydi ndih leydi safalve tan e rollude zemngal Arab nokku mo foti jogaade e leydi he. Koninkoove hevtunoove laamu ve e jokkondiral mumen e sevvitiive safalve njeeyni won de Arab ko kanum woni zemngal potngal liggoreede e leydi he, e ngam hevde valeeve ve kevtini "zemze tati ngendiije ze", ve mbiy Farayse ko zemngal kozal, zum ko e hitaande 1980.

Tuggi hitaande 1979-1985: fayndaare nde woznoo koo yoo zemngal Arab mawnu e leydi he, ve puuntiri valeeve yoo "zemze ngenndiiji ze ngonoy zezze liggorteeze, kono ala e sago ala e sago evvooji e wittoooji e heblooji mbaze haa ze mbaawa sozeede e duze laamu, ve njavi yo ze mbinnde e alkule latin, duzal zemze ngenndiiji sosaa. E nder yaakaare mavve ve njiznoo ko yo Arab won zemngal denndingal moritaninaave fof, kala cukalel naatngel janngde ina foti haalde zemze zizi ngenndiiji tawa arab ina e majje. Farayse wonde zum zemngal ngam dande udditaade e aduna, yoo aroy e caggal, zemze ngenndiije vurtoo zum. Kono ziizo evvoojhi fof ndonki siyneede

Nde ziin miijooji ndonki siyneede, ardiive ve kadi ngam riiwtude jangde zemngal Farayse e leydi he, pecci dawrugol jangde leydi ndi: Ko vuri heewde maa mbiya safalve fof payraa e janngde Arab, valeeve payi e jangde Farayse. Caggal zuum ve udditi duze jarriborze jangde zemze ngenndiiji e Nuwaasot e nukkuuji gozzi e daande maayo. Nde yahnoo haa woodi valeeve faamve wonde ve mbaziri noon ko ngam yizde riiwtude zemngal farayse ngam mbele Valeeve ina njannga Arab ala e sago e yantude kadi miijaade valeeve ve wonde so nezzo jannginii vingel mum e zemze ngenndiiji ngel jogoraani liggoraade ze e nder leydi he alaa ko haali noon caggal leydi. Zeen duze uddaa, valeeve payti e duze jannginirteeze zemngal Farayse jogornongal maayde e anniya mavve. Ko zum tagi oozo anniya joofaano.

E kitaale 1999-2001, laamu ngu wayli dawrugol jangde leydi laawol joyavol  tuugnaade zum e zeezo geze:

- wonde jannginirde zemze keewze ina keewi fere, ina naamndii kaalis keewzo, wazi noon ina naamndii jannginoove heewve, ina naamndii kavirze keewze.

- Wonde janngoove ve njahraani yeeso e doge karraagal kadi ve kevindaaki zemze ze no feewi.

- Wonde heblooji bazeteezi zi njahdaani e xellitaare faggude e renndo leydi ndi.

Ngolzoo baulagol artirii walla veydii hitaande walla tolno e kolees, kadi Hiisa, siaas, fiisik fof njannginirteeko zemngal farayse kono filo, istuwaar, goograafi, IC, IR kala ko fayti e pinal jannginirteeko zemngal Arab. Ko goonga yoga e safalve haa teengti noon e sevvitiive ve ina njinnoo ko vuri zum. Kono enen valeeve ezen poti waztude hakkillaaji: ve mbazii peeje fof ve ndonkii waztude en safalve no hardaneeji nih, jooni ve nattii huutoraade nddoldoolaagu, ve kuutortoo ko hakkillaaji mavve, so tawii kala geze pial ko e Arab njanginirtee, so tawii cukalon valeeve nahrii oon bannge so reenaaki tan ngontat ko ve ngoni ko, kadi so tawii cukalel danaani tovve (5) e Arab walla farayse hevataa ko wiyetee Berwe walla Bak. En njiy ko wiyetee 'serie AB' nattii e nder ndiizo mbaylaandi, ina firta ezen nganndi kuccam zam haa tenngti noon zemze ngenndiiji mbeddaa ko jaavi haattirde.

Kono wasiyaaji njogiimi ko yoo en ndun sukaave men yoo njanngu Arab o, hoto mbelsindo zemngal Arab ngal sabu, kadi yoo tiizno e zemngal Farayse ngal ngam mbaawa yahrude karraagal sabu ko zuum hay sinno ina wazi mogge ko kanum woni kuccam laamu hannde ngu. Kadi ezen poti xeewde yoo zemze men zee ndokke hakke mum e leydi he, yoo coze e duze laamu, yoo liggore. Enen valeeve en calaaki yoo zemngal Arab jannginire, hay sinno nih ko ve jinnganve koye mavve, kono cali zen ko yoo Arab wazire kavirgal ngal yoolde hujjaaji men e leydi he, yoo Arab huutoree ngam majjinde zemze men e yoolde pine men. Ngannden ko ndeezo fayndaare safalve njogii, e yonta fof eve vosa e ballondiral mavve e aarabeeve e tuubakoove, sabu maslahaa mumen ina heen. So en xeewii hannde dawrugol caggal leydi foozanii ko leyzeele aarabeeve e islaamiyankooje wazi noon Moritani ina wallave sarde zemngal mavve Arab e yaajnude pinal mavve Islaam e nder leydi he haa e nder Afrik valeejo. Yoga e ardiive aarabeeve maa islaamiyankoove yantude e dille nder leydi ndi, mbaawnii laamu ngu walla Muhammed Wul Abdul Asiis yoo tax jokkondiral hakkunde Moritani e leydi Israaiila, ko zuum veydii jaggande mo junngo e walludemo. Zeezo leyzeele hono Libi, Iraan, Kataar, Siiri, Kuwoyti, Suudaan ekn...

Won e valeeve wiyoove wonde e yonta Muttaar Wul Daddah, potal ina waznoo e leydi he, valeeve ina kalfinanoo jaagorze mawze e nder leydi he, kono zuum ko waasde veen faamnoode walla zaminanoode e makko. kono saabinoo zuum ndeen ko zemngal Farayse vurnoo waawde jannginireede e leydi he, kala ko valeeve vurnoo janngude ngal. Ko valeeve o huutorii haa aafi ndalli Moritani, omo liggoroo hakkille, omo xeewa holno Arab waawirta lomtoraade Farayse. O naatii noon e juumre mawnde o naatni leydi ndih e hare Sahara, leydi ndih woznoon ko ndoofoldi, Sahara zesii heptude ndi nih hay sinno Maruk e Farayse ko e mayri wondi. Nde sevvitiive safalve ngarti e leydi he caggal nde njanngoyi njoton diri e sevvitiive aarabeeve caggal leydi ndih, njizi laamaade mbele ina ciina waztude Moritani leydi safalve 100%, zuum noon gasataa so wonaa ve kenoo ve liva Muttar Wul Daddah, mbele geze ze ina njaawa sabu hare sahara nde tardinii golle safalve e yizde waztude moritani leydi aarabeeve 100%. Ve mbaawaano livde Muttaar so wonaano ve njokkondiri e koninkoove, ndeve njokkondiri e koninkoove ve livi Muttaar, ve ndartini hare sahara e hitaande 1978, e hitaande 1979 dawrugol janngde waylaa, Arab dani doole. Ko hedde 1981 ve kevtini zemze ngenndiiji kono wonaano haaju mavve yoze njannge ze liggoree zuum wazi yahaani hay nokku, kono hazataa enen kam janngude zemze men, sabu lenol waawaa vamtaade gaagaa zemngal mum. Sirru nani e zemngal, so ngal janngaama, jannginiraama, wiztaama tan lenol maggal vamtoto.

Safalve mbonnii dawrugol janngde leydi, e baylagol sakket dawrugol janngde nde, en njiyii so tawii ezen njogii gite nanooje, paamooje wonde sukaave janngoove hande ve alaa fof zemngal kevindii: wonaa Farayse, wonaa Arab, wona Anglais, kanje fof ko ve afxoove ze tan alaa heen fof ngal ve ziggini wazi noon ko dawrugol ngol miijaaka no feewi, kadi laawol jannginirgol ngol jannginoove ve kevindaaki ngol. So tawii noon jannginoowo hoccaa ko e mbedda walla heblaa ko e lebbi wolla jonte, oon waawaa jannginde cukale faama sabu alaa humpito to bannge zemngal ngal ko adii fof, hevindaaki laawol jannginirgol ngol kadi alaa hay dara ko fayti e ko wiyete hakilantaagal. Nde aduna oo fof hawri Jomstien hedde Tayland e 1990, leyzeele mawze ze kunii wonde hay leydi ngootiri fotaani woppude sukaave mum e humambinnaagal tawa saabii zum ko rafi ngalu, kadi e hitaande 2000 to dakaar ve mbiyi kala nezzo ina foti janngude. Balla keewze naatii e moritani gila ndeen, balla ze ina mbaawnoo huutoreede no haanirta nih haa dawrugol janngde moxxol danee, kono ko vuri heen heewde dirtina ko heddiii heen ko huutoraa e paydaale waztude leydi ndih leydi safalve 100%. Hankadi ngam fuuntude rokkoove ngaluuji ve, ve njaltini doosze wonde alaysagoyaagal janngde wonande kala cukalel potngel naatde duze laamu. Ve urnii ve mbiyi vuri himmude tan ko yoo sukaave njanngu hay sinno paamataa ko njanngata ko, ve xeewi keewal kono ve xeewaani kevindagol ngol. Ve natti tardinde sukaave so tawii ngalaa hakke yawtude e tolno dewzo e tolno ngoni o. Ndeve nganndi wonde jangde nde ko ko boni, ve ceerndi, valeeve mbazti jannginireede Farayse, safalve mbazti jannginireede Arab. Caggal zuum duze ze ngonaa laamu uddita, ngonti no bitikaaji nih, jannginoove laamu ndogani toon , won heen natti nih arde jannginde duze laamu ze, jokkondiri zum e laamu tan ko so lewru maayii ina heva njovdi mum. Veydiive udditde duze ze ngonaa laamu ko eve njogii jawdi eve mbaawi yovande vivve mavve, kono yoga e valeeve ngalaa ngalu saka nawa vivve mumen to duze laamu. Duze jaavi haaztirde cosa, vivve miskineeve so kevii Bak, payree toon, vivve safalve walla wallidive safalve payree e duze jaavi haaztirde leyzeele mawze walla aarabeeve, so ngartii ndokkee liggeyaaji moxxi. So en xeewii hannde lamii Moritani ko janngunoove Arab walla janngoynoove leyzeele aarabeeve tawa ko safalve. Ko zuum wonnoo fayndaare mavve, waztude liggoraade zemngal Arab. Xeewen hannde ko janngintee, sukaave tokosve ina njannginee cimooje mawze, walla jookli Islaam mawzi walla geze ze njahdaani e hakkillaaji walla duuvi mumen, tawa kadi njannginirtee ko e zemngal Arab, ngal ve muuynaani, ko zuum wazi yoga e sukaave men koko mbemji. Hay enen jiknaave hannde ezen njogii ngaanumma, tawde kuccam mavve ko yoo Farayse nattu jannginireede, hay sinno eve payta e zemngal kozal gonngal.

Moritani gila hade njiymaandi tuubakoove walla Farayse, ngam yizde yoo zemngal Arab e diine      Islaam jaalo e mum janngeteeno e leydi he ko Kuraana, duze Kuraana ngonnoo e leydi he, ko zuum saabii nih yoga e mavve njizaano Farayse gila adan.