2015 feccondirii kono maa mbiya Baasal, Heege, Majjineede e Cellal ina ɓeydoo e nder Afrik

Caggal nde leyɗeele mawɗe ɗe njuppi kaalisaaji keewɗi e nder leyɗeele tokoose mbele ina mbaawnaɗum naatde e jehre adunayankoore ; ɗe tawi wonande ko ɓe mbiy wonde kaalisaaji ɗi kuutortaaki no ɓe njiɗirnoo nih sabu ko ɓuri heewde e majji naatata ko e jeybaaji ardiiɓe leyɗeele ɗe ; ɗe pewji hankadi yo ɓe uddu sewnde nde ɓe mbele hankadi Banke Monjaal ina naata e leyɗeele he . Banke Monjaal nde naati e nder leyɗeele tokoose ɗe haa teeŋti noon e leyɗeele Afrik ; Banke o wiyata ko ina ñamla kono ala e sago leyɗeele tokoose ɗe usta pirlitte ka fayti e Jaŋde e Cellal waɗi noon ko ɗeen jaagorɗe ɓurnoo waawde moɗde kaalis.

Ɗuum ina firta wonde leyɗeele mawɗe ɗe fayndaare mumen wonaa ɓamtaare leyɗeele tokoose ɗe ; sabu so wiyaama yoo leyɗeele tokoose ɗe ustu pirlitte mumen ko fayti e Jaŋde e Cellal ; ɗuum firti ko yoo ustu janngooɓe ; jannginooɓe ; duɗe. Kadi yoo ustu safrooɓe e nokkuuji cafrorɗi.

Ko e ndiin punndi batu eɓɓa e hitaande 1990 ; ko e oon batu ko wiyetee PAYNDAALE ƁAMTAARE compaa. Payndaale ɗe ko ɗe 8 ; kadi ɗe poti yotteede ko   e hitaande 2015. Hankadi kala leydi so ina waɗa payndaale mumen ɓamtaare ko e ɗeen payndaale tuugnotoo. Payndaale 8 ko ɗeeɗe garooje les ɗe

1)    Ustude haa feccere baasal e heege

2)    Hokkude gooto fof janŋude haa joofna tolno 1

3)    Ƴellitde potal hakkunde debbo e gorko

4)    Ustude maayde sukaaɓe 2/3

5)    Ustude maayde Yummiraaɓe jibinooɓe ¾

6)    Momtude laygol rafi SIIDA e ñabbuuli goɗɗi

7)    Jogaade duumaare ngaluuji sato

8)    Waɗde jokkopndiral adunayankeewal ngam ƴellitaare(Balle, Njeeygu, ñamaande, ganndal kesal)

Eɗeen kitaale jeewde keewɗe tuugninoo ko e deeƴre ngalu mawɗo ; laamu moƴƴo e buuñgol e tawegol yimɓe renndo hŋy sinno e nder batu mo kaalnoɗen dow o ɓe tawtoraaka.

So en mbaɗii payndaale ɗe e doge maa en low ɗe e doge 3; Jaŋde; Cellal e Sato. So en ƴeewi fayndaare addande nde hono Ustude haa feccere baasal e heege tuggude e hitaande 1990 haa e hitaande 2015 ina woɗɗi nannaade; sabu so en ƴeewi duuɓi leyɗeele mawɗe ɗe mbaɗi haa ɓamti; e yantude kadi nde leyɗeele tokoose ɗe njiima nde ɓe kosiino ngaluuji leyɗeele tokooe ɗe; kadi nawi junŋo liggotoongo leyɗeele ɗe.

Ndeeɗo fayndaare leyɗeele tokoose ɗe mbaawata yettaade ɗumen sabu majjere fawaande e dow maɓɓe nde; hannde woodi tan ko ganndal leyɗeele mawɗe; ko ngaal woni tuugnorteengal caggal nde leyɗeele mawɗe naati e majje; nuski gannde majje ɓooyɗe; pine majjie ɗemɗe majje; caabii hareeji mawɗi hakkunde leyɗeele ɗe; yŋntude e yoorooji duumiiɗi e nder yoga e leyɗeele tokoose ɗe haa teeŋti noon e leyɗeele Afrik banŋge worgo jeereende.

Ko ɗuum waɗi leyɗeele tokoose ɗe potaani yowitaade e leyɗeele mawɗe ɗe ngam ƴellitaade walla ustude baasal e heego e nder mumen sabu leyɗeele mawɗe ɗe wonaa fayndaare mumen yoo leyɗeele tokoose ɗe ɓamto walla yoo ceertu e baasal e heege; ɗo ƴeewen konŋol pulaar biyowol ²Maa feere bona; nde feere moƴƴa². Ko e baasal leyɗeele tokoose ɗe; leyɗeele mawɗe ɗe ngalɗata.