Leƴƴannde e Daartol men

So mi miijiima Boosoya hanki mo ndaartanaami, mo niɗ-mi wiɗtude

So mi miijiima Fuuta hanki, nokku Ndoondi Demmba Nayel

So mi miijiima Asnde Balla, Njaakir, Hooƴo e gudduɗe hanki

So mi miijiima Asnde Balla gontuɗo Palel gontuɗo Awoynaat hannde

So mi miijiima Njaakir gontuɗo sincaano Njaakir e Deysarak hannde

So mi miijiima Hooƴo mo doole mum ngonti Jiinga Hannde

So mi miijiima Gudduɗe pecciiɗo e Moongel, Jaaɗul e Guumel hannde

So mii miijiima Fuuta hanki goɗɗuɗo e daartol

Mi siftora Saye – Paate mo Belal e Yero Njalti e mum

Mi annda Belal woni laamɗo Bunngu, Yero woni laamɗo Hooƴo

Mi siftora Arɗo Njaakir wonaano tan laamɗo Njaakir

Mi annda o halfinanooma leƴƴi fulɓe e Falnde Hoyre Foonde

Mi siftora Arɗo Cammbulel- Yugu- Jaaɗul- Aljumaane

Mi annda ko ɗoon Uururɓe Ngasama e Uururɓe Mbaytoor njalti

Mi wiya ko ndeen Uururɓe Mbaytoor ngonti Nduyeeɗɓe

Mi annda Yaladi- Ilo yalti e mum ko Demmbakka Jah e Buubu Jah

Mi annda Jaawɓe waalo njalti ko e Demmbakka Jah

Mi annda Jaawɓe Jeeri njalti ko e Buubu Jah

Mi sikka kadi Arɗo Edi ko e mum Edinaaɓe fof njalti

Mi yananee ɗum ko ngalu potɗo wiɗteede, winndeede, daartanee arooɓe

Mi yananee ko jangde, wiɗto e binndol njiytata hanki

Mi laaɓee ko jangde, wiɗto e binndol, mooftata hannde

Mi waasa feccude sikke ko jangde, wiɗto e binndol, kuutortee janngo.