Fedde Piindi Pinal Boosoya: Lekki fiindi wommbee

Hanki jamma 07 Janvier 2017, to suudu jaɓɓotoondu dille pine, conce, ñeeñe, naalankaagal wiyeteendu LA CASE, ɗo e Nuwaasot laamorgo Ndenndaandi Islaamiyankeeri Moritani, Fedde Piindi Pinal Boosoya e jummbugol Jallungol Pulaar njuɓɓinii jamma pinal ŋarɗuɗo, ɓe kollirii nootiiɓe ɓe wonde ɓe pultaaki. Fedde Piindi Pinal Boosoya noon ko fedde sukaaɓe rewɓe fulɓe hoɗɓe  e ko ɓurin heewde e Rewo Boosoya. Siftinde annduɓe, jannginde ɓe ngandaa, Boosoya ko diiwaan, e nder Fuuta ndeen, Booosya kadi ina wiyetenoo ‘Reedu Fuuta’ sabu diiwaan o wonde hakkundeejo, diiwaan o wonnoo ko falnde Kayhayɗi.

Ɓeen sukaaɓe teddinirii jamma o hono yimɓe ɗiɗo, gadano o ko gorko pullo cuutinke so en ngaskinii seeɗa hono Abdul Boɗeejo to teccaan e gorko capaato biyɗo ina yiɗi wontude pullo, kaaloowo pulaar laaɓɗo cer tawa ɗemngal mum loggaani hono Addaahi wul lakhɗeera. Fulɓe, safalɓe, jolfuɓe, sarakkulleeɓe nootiima eeraango maɓɓe, njinnganii ɓe, njinnganii leñol fulɓe sabu noddude nootee wonaa huunde weeɓnde.

Ko ɓuri teskinde e jamma o, ko gargol hoohooɓe to bannge pinal fulɓe, gelooɗe ɗiɗi hono Gelonŋal Fuuta ganndiraaɗo Njaay Saydu Aamadu, e Geloŋal Bah ganndiraaɗo Jibi Bah; so ɗee gelooɗi ɗiɗi ngarii e jamma pinal firti ko huunde nde rewat laawol sabu eɓe njooɓii duwaawu leñol.

Jamma o kadi barkiniraama e gargol naalankooɓe mawɓe leñol ngol hono Diɗɗal Jaalal teddiniraaɓe jamma o, Bah Sammba Jombolo bammbaaɗo sukaaɓe yuɓɓinɓe jamma o, Raasin Jah, walla mbiya RJ walla ngal pulal e Seek Maal ekn…Ɓe mbeltinii yimɓe ɓe e gaaci maɓɓe belɗi e jime maɓɓe juɓɓuɗe.

Caggal nde Mikro central maɓɓe hono Makki Tammba Joop, noddi yiilirde fedde nde, Hooreejo Fedde Piindi Pinal Booosya hono Bah Kajja Beela udditirii jamma o bismaade yimɓe ɓe fof e kuuɓal e yettude ɗumen e nootagol mum en ŋarɗungol, naata ko wejo kuutorɗe men hanki gila e jaɓɓorɗe haa penndirɗe haa keddirɗe haa e beɗi e ñorɗe, ñelule e raɓɓikinaade kaggu debbo pullo hollira, Gelongal Fuuta hono Njaay Saydu Aamadu njumpi heen haa yimɓe mbeltii, geɗel fof haali ko firti e ko sifoto. Nde wejo ɓenni, faya ko e mogooji tinndinooje e jime basiitooɗe e ngootaagu, ɓamtaare e darnde leñol.

En njaari fedde nde, nde newnani en e rokkude konngol e tuugnaade e wonde en gooto e ɓurɓe duuɓi renndo men tawtoraaɓe hiirde nde. En kuutoriima oon fartaŋŋe ngam bismaade yimɓe ɓe gongol e innde fedde nde, kadi en kuutoriima fartaŋŋe o ngam anndinde haa teeŋti noon e hoohooɓe pinal ɓe holi ɓee sukaaɓe yuɓɓinɓe ndee hiirde. Biyɗen heen ɓee sukaaɓe ko NGena, Taaniraaɓe Ndoondi Demba Nayel, Arɗo Njaakir, Sammɓba Jibi Hel Ceenel Sewa Hoggo, Alhajji Maamuudu Bah, Alhajji Umar Deh, Demmba woola, Abuubakry Kaaliidu Bah ekn…Ɓee worɓe ko ɓe daartol fulɓe tonngi wiɗti winndi golle mumen, en kollirii yimɓe ɓe, ɓee sukaaɓe ko calsaltiri maɓɓe. En kuutoriima kadi e hojomaaji seeɗa njoginoɗen ɗi e wasiyaade sukaaɓe ɓe, nde tiiɗnotoo e dental e paamondiral e gollanaade suudu baaba, e nehde ɓesnguuji men e ɗemngal men, pinal men e fina tawa men. En mbasiyiima ɓe yo ɓe njokku golle ŋarɗuɗe ɗe ɓe mbaɗata ɗe.

Caggal ɗuum fedde nde ɓoornii teddiniranooɓe ɗiɗo ɓe gooto e mumen fof Wutte e Cakkal mum e tuuba mum e kaala folmaat e paɗe mukke. Caggal njeenaari ndi Goggo Dadde Aminata Cukkiri walla mbiya Goggo Dadde Aamadu Jeewo walla Goggo Takko Aamadu Bayla, yettii nootitiiɓe ɓe, yettii kadi sukaaɓe ɓe e darnde mumen. Nde o joofni faya e gaaci e kolli belɗi haa hiirde udda taw laari weetde. waalaama gite kecce kono ko e yiɗde leñol alaa nimsa.Ina waawi leppi ɗi so njalti gooto fof yiyra yitere mum, heɗoroo nofuru mum.